काठमाडौं, ९ पुस
सरकारले नेपाली कांग्रेसका सभापति गिरिजाप्रसाद कोइरालालाई विश्वप्रसिद्ध नोबेल शान्ति पुरस्कारका लागि नेपालका तर्फबाट सिफारिस गरेको छ ।
बिहीबारको मन्त्रिपरिषद् बैठकमा प्रधानमन्त्री माधवकुमार नेपालले राखेको सिफारिस प्रस्ताव सर्वसम्मत पारित भएको हो । नेपालको शान्तिप्रक्रियामा कोइरालाले पुर्याएको योगदानका लागि नोबेल पुरस्कार पाउनुपर्ने दाबीसहित सिफारिस गर्ने निर्णय बैठकमा भएको प्रवक्ता एवं सञ्चारमन्त्री शंकर पोखरेलले बताए ।
यसैगरी, सरकारले नेपाली सेनाका उपरथी तोरणजंगबहादुर सिंहलाई बलाधिकृत रथीमा बढुवा गरेको छ । मन्त्रिपरिषद्को बिहीबारको बैठकले उपरथी सिंहलाई बलाधिकृत रथीमा बढुवा गर्ने निर्णय गरेको हो । उनी द्वन्द्वकालमा भैरवनाथ गणमा रहेका ४९ आस्थाका बन्दीलाई बेपत्ता बनाउने कार्यमा संलग्न रहेको भनी राष्ट्रिय तथा अन्तर्राष्ट्रिय रूपमा विवादित सैनिक अधिकृत हुन् ।
सेनाभित्र उनी प्रधानसेनापति छत्रमानसिंह गुरुङपछि दोस्रो बरियतामा रहनेछन् । तत्कालीन प्रधानसेनापति रुक्मांगद कटवालको पालामा दोस्रो बरियतामा रहेका कुलबहादुर खड्काको अवकाशपछि यो पद खाली थियो ।
मन्त्रिपरिषद् बैठकले नेपाली सेनाको लोकतान्त्रीकरण गर्न रक्षामन्त्री विद्यादेवी भण्डारीको संयोजकत्वमा पाँच सदस्यीय मन्त्रीस्तरीय समितिसमेत बनाएको छ । समितिमा गृहमन्त्री भीम रावल, कानुनमन्त्री प्रेमबहादुर सिंह, संस्कृतिमन्त्री मीनेन्द्र रिजाल र विनाविभागीय मन्त्री लक्ष्मणलाल कर्ण सदस्य छन् ।
बैठकले नेपालस्थित संयुक्त राष्ट्रसंघीय मिसन अनमिनको म्याद चार महिना थप्ने निर्णय पनि गरेको प्रवक्ता पोखरेलले बताए । अनमिनको म्याद आगामी ९ माघमा सकिँदै छ ।
त्यस्तै, सरकारले रुकुमकी पत्रकार टीका विष्टलाई उपचार तथा राहतस्वरूप तीन लाख रुपैयाँ दिने निर्णय गरेको छ । आफ्नै सहकर्मीबाट बलात्कृत महिला प्रहरी सुन्तली धामी घटनाबारे छानबिन गर्न पनि मन्त्रिपरिषद् बैठकले समिति गठन गर्ने निर्णय लिएको मन्त्री पोखरेलले बताए ।
